Act 26 | MHL | STEP | Ne aria Agripa-ke Pol maakek, “Aakisa no-ko aakune.” Naeya Pol-ke iikirap yo efa miimeka naep wapena wuami maek,

Acts 26

Pol-ke Agripa opora wafuromak

1 Ne aria Agripa-ke Pol maakek, “Aakisa no-ko aakune.” Naeya Pol-ke iikirap yo efa miimeka naep wapena wuami maek, 2 “Saria Agripa, yo wi opor unowa mia-pa efa wuamik nain no mokoka-pa pika yame opami opora maowa nain kema urupiyem. 3 Moram no i Yuuda sira yiar amisar-afuran, yiena lotu sira, ne opora sira-sira aakunimik nain pun. Naapeya sira eliwa, no kekelka naap pokap ikok yo opora efar miime.

4 Yo yiena Yuuda teeria-pa arimem, iiriw owow oko-pa ikok urupep Yerusalem-pa nan ikem. Ne wi Yuuda soomarowa ne pokow sira balisow efar amisaremik. Yo iiriw Farisi sira-pa ikok i unowiya yiena lotu sira kekanowa akena ookam-ikemik. Wiena yo sira efar mau naep-na eliw ariman mauk. 6 Wi yo opora-pa efa wuamik nain opor onoma feenap, iiriw Mua Maneka i nembesir awona teeria ten kuisow erup nain wia iikirowowa opora wia maakep koonowak. Ne i aakisa wiena nembesir-ke Mua Maneka anane farem-ikaimik fain opora nain makena arinok naem-ikemik. Yos pun opora kuisow nainiw maem-ikaiyem. Opora muut nain wi Yuuda-ke opora-pa efa wuamik. 8 Ne ni mua unowa fain, moram naap maiman, Mua Maneka mua wia iikirowowa nain naap-ko me ikua, naap naiman.

9 Ne yo iiriw Nasaret mua Yeesus opora me wiar ookowa sira-sira kamenap onap unuma porekam naep naem-ikem. 10 Naap maep yo Yerusalem-pa nan ikok sira-sira feenap onam-ikem, wi pris woos mua-ke opora parosifa-pa siisimep yiiwkin feekiya ikiwep wi Kristen teeria opora-pa wia wuami pina wiem-ikem. Ne wi wia ifakimowa maemik nain yos pun eliw naem-ikem. 11 Ne yo owow unowa wiar ikiwep lotu koora-pa wiam fiirimep ikaiwkin wi Kristen mua akena wia opap pina wiem-ikem. Naap onami Yeesus unuma wiar samoreka naep wia kakankam-ikem. Ne yo nain kema manekiw ikok kema bagiawiw soomaremi owow oko-oko ikiwep wi Kristen wia akupam-miem. Wia imenap wia opap wia samoram-ikem.

12 Aria uuwowa muut nain wi pris woos mua-ke opora parosifa-pa siisimep yiiwkin feekiya Damaskus ikiwem. Aria aakisa baliwep efa miime. 13 Yo ikiwem-ikok ama gonegon owowa nain mamaiya arem-ikemkun parina maneka-ke oromi yia mikak. Parina manek akena, ama parina nomakek. 14 Parina nain-ke yia mikeya i unow onaiya wakiep miiwa-pa inemik. Yo inep ikok iwakara oko yiena Iibru opora-pa maeya miimam, feenap maek, ‘Sol, Sol, no moram yo efa samoram-ikain? No nena name ekerami maa anima-pa name wuam-ikain,’ naap efa maakek. 15 Ne yos-ke nokarem, ‘Maneka, no naarewe-ke?’ Ne os-ke maek, ‘Yo Yeesus-ke, yo efa samoram-ikain nain-ke. 16 No iikire. Yo uuwowa-ko niekam naep nefar imenarem. No maa aakisa nefar imenarek fain ne maa papako ikoka nefa ofakowinen nain ikiwep wia maakem-miawe. 17 No ikiwep wi owow oko teeria ne wi Yuuda opora wia maakeya nefa samoru naep oniwkin-na yena nefa asipamkun me nefa samorikuan. 18 Ne no opora wia maakeya wi mokoka oparep ikemik nain mokoka wilinep Mua Maneka opora miimikuan. Ne iiriw Satan wia kaikeya ikemik nain piipuap Mua Maneka kekanowa-pa wiar ikaikuan. Naeya Mua Maneka-ke pina wiar iirareya yo teeria-pa efar ikaikuan, wi iiriw yo opora efar opami sira efar ookam-ikaimik nain epaskun ikaikuan.’ Yeesus-ke naap efa maakek.

19 Aria saria Agripa, naapeya yo nain urufap opora me wiar fienam. 20 Mokomokoka Damaskus-pa ikok wia maakem-ikem ne Yerusalem pun ikiwep wia maakem-ikem. Ne Yuudia kame ikiwep owow unowa wia maakem-ikem. Ne ikiwep wi owow oko-oko teeria pun wia maakem-miem. Feenap wia maakem-ikem, ‘Ni kema kirep Mua Maneka opora wiar miimeka, ne i kema kiremik niam naemi-na sira eliwa-pa ikeka.’ Naap wia maakem-ikem. 21 Yo opor muut nain wi Yuuda-ke tempel koora-pa efa opami efa ifakimu naep onamik. 22 Nain Mua Maneka-ke efa asipam-ikua, ne aakisa pun efa asipam-ikaiya. Naapeya yo aakisa fan iimarep ni mua unumiya ne mua papako mokok epa-pa aakunem-ikaiyem. Yo opor oko-ko me maem, yo opora kuisow iiriw Moses ne wi profet maem-miemik nain muutiw wiar maem. 23 Feenap maem-ikem, ‘Yeesus sirirowa maneka aawep umok. Ne ookikir iikirami i umep kiiriw iikirowa nain era yia wuomak. O iikirami i Yuuda ne wi owow oko oko teeria parina yia wuomaya i Mua Maneka eliw wiar ikiwiyen,’ naap maem-ikem.”

24 Pol opora naap maem-ikaeya Festus-ke kerew faremi maakek, “Sue, no woosa momoraren. No suule kerew akena arep naap momoraren-yon aa.” 25 Naap maakeya Pol-ke maakek, “Yo maken akena maiyem. Yo me momorarem. 26 Opora maem nain saria Agripa amisarep ikua. Naapeya yo eliw mainen. O maa unowa ariman imenarek nain iiwawun amisarek, moram maa kuisow-ko me pipilimemik. 27 Aria saria Agripa, no wi Mua Maneka profet opora maemik nain makena-ke wiar nain-i e weetak? Yo kema naap wuiyem, wi opora nain makena-ke wiar nain, naap nefa naiyem.” 28 Ne Agripa-ke maakek, “Yo no opora ara kuisow nefar miimap ikoka kuisow kema kirinen efa nain-i?” 29 Ne aria Pol-ke maek, “No ikoka kuisow Mua Maneka teeria wiar ore, e ikoka ikoka wiar ore, naap me maiyem, weetak. Yo kookalowa-ke feenap, yo Mua Maneka teeria-pa wiar ikem. Naeya Mua Maneka nia maakemkun no ne ni mua aakisa yo opora efar miimam-ikaiman fain pun unow onaiya o teeria-pa wiar areka naiyem. Yo aakisa sen-pa efa kaikap-puamik, ne ni feenap me nia kaikikuan naiyem.” Opora naap wafurak.

30 Ne Agripa pokap ikok iikireya anim onom maneka Festus, Benaisi, ne mua papako unow onaiya iikirami koor kemena oko ikiwep wieniw aakunemik. Ne maemik, “Mua fain sira-ko me samorak, naapeya o ifakimowa ne koora-pa wuowa nain era marew.” 32 Neemi Agripa-ke Festus maakek, “Mua fain, Siisar wiarik opora-pa efa wueka, naap me maekak-na aakisa eliw piipueya ikiwekak.”